धन ब बोहरा डोटी
डोटीको के आई सिंह गाउँपालिका– ६ फलेडीबासीले चुलोमा खाना पकाउँदा आउने धुवाँबाट मुक्ति पाएका छन् । ग्रामीण जीवनस्तरमा सुधार ल्याउने उद्देश्यले Livelihood Funds को आर्थिक सहयोग तथा Practical Action र आस्था नेपालको साझेदारीमा उक्त वडाका ४० परिवारलाई शनिबार धुवाँरहित वायुपंखी चुलो वितरण गरेपछि धुवाँको समस्या हटेको हो ।
बायुपंखी चुलोले घरभित्र धुवाँको असर हटाउनुका साथै इन्धनको खपत घटाउने,महिला दिदीबहिनीको समयको बचत हुनुको साथै स्वास्थ्यमा सुधार ल्याउने र वातावरणमैत्री जीवनशैलीलाई प्रोत्साहन दिने आस्था नेपालका फिल्ड साहायक गणेश खड्काले बताउनुभएको छ।
प्रति चुलोको एकाइ लागत रु ६ हजार ३ सय २५ पर्ने भए पनि त्यसमा रु ३ हजार ७ सय आस्था नेपालको अनुदान रहेको थियो। बाँकी २ हजार ६ सय २५ उपभोक्ताले व्यहोर्नुपर्ने भए पनि उक्त रकम मध्ये मष्टा मेलउनी सामुदायिक वन उपभोक्ता समितिले १एक हजार ६०० उपभोक्ता स्वयंले रु १ हजार २५ मात्रै तिरेको खड्काले जानकारी दिनुभएको छ।
स्थानीय बासिन्दाहरूले बायुपंखी चुलो प्राप्त भएपछि स्वास्थ्यमा सुधार हुने तथा समाज स्वच्छ हुनाका साथै वातावरणमा समेत सुधार हुने भन्दै वातावरणमैत्री प्रविधिले जीवनमा सकारात्मक परिवर्तन ल्याउने विश्वास व्यक्त गरेका छन्।
