Aawaj Nepal
Aawaj Nepal

सरकारकाे लापरवाहीका कारण काेराेनाकाे उच्च जाेखिममा काठमाण्डाैं


आवाज नेपाल, २०७७ साउन १४ बुधबार


सरकारकाे लापरवाहीका कारण काेराेनाकाे उच्च जाेखिममा काठमाण्डाैं

लकडाउन’ अन्त्य भएसँगै काठमाडौंको दैनिकी पूर्ववतरुपमा फर्कंदै गएको छ ।

सहर–बजार खुलेका छन् भने सार्वजनिक यातायात सञ्चालनमा आएपछि आउजाउको चाप पनि बढिरहेको छ ।

सहर यो गतिमा चलायमान भइरहँदा यसको प्रत्यक्ष असर भने कोरोना महामारीमा देखिएको छ ।

केही दिनयताको तथ्यांक हेर्ने हो भने पनि काठमाडौं उपत्यकामा संक्रमितको संख्या बढ्दै गइरहेको छ ।

तर, संक्रमणको जोखिमलाई बेवास्ता गर्दै सुरक्षा सावधानी अपनाउनेतर्फ भने सबै लापरवाहजस्तै देखिन्छन् ।

लकडाउन खुलेसँगै बढ्दै गएको सवारी चाप र भिडभाडका कारण काठमाडौं उपत्यका कोरोनाभाइरस संक्रमणको उच्च जोखिममा रहने भन्दै विज्ञहरुले सचेत गराउँदै आएका थिए ।

उपत्यकामा लकडाउनको समयमा नै काठमाडौं प्रवेश गर्नेक्रम नरोकिँदा संक्रमित पनि थपिरहेका थिए ।

तर, केही दिनयता भने उपत्यकाका विभिन्न क्षेत्रमा संक्रमित बढ्दो संख्यामा थपिँदै गएका छन् । मंगलबारमात्रै उपत्यकामा ५३ जनामा संक्रमण देखियो । तीमध्ये ४८ जना काठमाडौंका थिए ।

संक्रमितको यो संख्याले घना आवादी भएको राजधानी सहर अब संक्रमणको उच्च जोखिम बन्ने खतरा बढेको देखिएको छ ।

संक्रमितको संख्या थपिँदै जाने तर स्वास्थ्य सुरक्षाका उपायहरु प्रयोगमा सावधानी नअपनाउँदा संक्रमणको भयावह अवस्था आउनसक्ने स्वास्थ्य मन्त्रालयले नै जनाएको छ ।

मन्त्रालयले संक्रमितको संख्या बढी देखिएका जिल्लाहरुमा लकडाउनको ‘मोडालिटी’ परिवर्तन भने गर्नु नपर्ने जनाएको छ ।

यसले पनि उपत्यकामा तत्काल संक्रमण नियन्त्रणका प्रभावकारी उपाय अपनाउनेभन्दा पनि जे भइरहेको छ, त्यसलाई नै निरन्तरता दिने पक्षमा सरकार देखिन्छ ।

स्वास्थ्य मन्त्रालयका प्रवक्ता डा. जागेश्वर गौतमले दिनहुँ ८ देखि १० प्रतिशत व्यक्तिमा देखिएको संक्रमण दर कम भएर हाल २ देखि ४ प्रतिशतमा झरेकाले तुरुन्तै लकडाउनको मोडालिटी परिवर्तन गर्नु नपर्ने बताउनुहुन्छ ।

उपत्यकामा पुष्टि भएका धेरैजसो संक्रमित बाहिरी जिल्लाबाट आएका मानिसहरु छन् ।

भदौ १ गतेबाट लामो दूरीका सार्वजनिक सवारी–साधन सञ्चालनमा आएसँगै उपत्यका कोरोना संक्रमणको कत्तिको जोखिममा रहन्छ, सहजै अनुमान लगाउन सकिन्छ ।

प्रवक्ता डा. गौतमले सर्वसाधारणले सुरक्षा मापदण्ड पालन नगर्ने अनि संक्रमित बढेमा सरकारले केही गरेन भनेर आलोचनामात्र हुने गरेको भन्दै आक्रोश पोख्नुहुन्छ ।

मन्त्रालयले हाल परीक्षणको दायरासमेत खुम्चाएको छ । दिनहुँ दुई हजारका दरले विदेशबाट मानिसहरु आइरहेकामध्ये जोखिममा रहेकाबाहेक सबैको परीक्षण गर्न देशको आर्थिक व्यवस्थाले पनि धान्न नसक्ने डा. गौतमले जिकिर गर्नुभयो ।

कोरोना संक्रमितको संख्या १९ हजार नाघिसकेको अवस्थामा संक्रमणप्रतिको सतर्कता र सावधानीमा हेलचेक्र्याईं गर्ने हो भने अवस्था भयावह हुने निश्चित छ ।

त्यसमाथि देशैभरबाट मानिसहरु उपत्यका प्रवेश गरिरहेकाले यहाँ कोरोना संक्रमण थप चुनौतीपूर्ण हुने देखिन्छ ।

Loading...
Loading...
Aawaj Nepal

प्रतिकृया

प्रतिकृया

370X180

धेरैपटक हेरिएको

370X180
370X180