Aawaj Nepal
Aawaj Nepal

मुलुक पुनः हिंसाको बाटोमा धकेलिने आशंका


आवाजनेपाल, २०७५ फाल्गुन २९ बुधबार


मुलुक पुनः हिंसाको बाटोमा धकेलिने आशंका

सरकारले नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीमाथि प्रतिबन्ध लगाएपछि मुलुक पुनः हिंसाको बाटोमा धकेलिने आशंका गर्न थालिएको छ ।

विप्लव समूहले आपराधिक क्रियाकलाप बढाएको निष्कर्षसहित सरकारले प्रतिबन्ध लगाएपछि प्रतिकार हुने र मुलुक पुनः हिंसाको बाटोमा धकेलिने आशंका आमजनताले व्यक्त गरिरहेका छन् ।

चन्दा आतंक बढाएको, ज्यानसम्म लिनेगरी विस्फोट गराएको र लुटपाटमा संलग्न रहेको आरोपमा सरकारले नेत्रविक्रम चन्द ‘विप्लव’ नेतृत्वको नेकपामाथि प्रतिबन्ध लगाएको हो ।

वार्तामा बोलाउँदा नआउने र नागरिकलाई आतंकित पार्ने क्रियाकलापमा विप्लव समूह संलग्न भएको सरकारको निष्कर्ष छ ।

विप्लवमाथि प्रतिबन्ध लगाउन सरकारले जे–जे आधारहरु लिएको छ, त्यसमा सहमत हुनसकिने धेरै ठाउँपनि छ ।

१० वर्षे सशस्त्र द्वन्द्वका बेला तत्कालीन माओवादीमा सक्रिय विप्लव समूह त्यहीँबाट चोइटिएर बनेको हो । विप्लव समूहले पछिल्ला दिनमा ठाउँ–ठाउँमा बम विस्फोट गराउँदै आएको छ ।

विस्फोटकाक्रममा ज्यानै जाने घटनापनि भइरहेका छन् । यसैगरी, चन्दा असुलीलाई पनि उसले निकै तीव्रता दिएको छ ।

व्यवसायीहरुलाई धम्क्याउँदै चन्दा उठाउँदै आएको यो समूहले हतियार देखाएर लुटपाट गरेको आरोप सरकारको छ ।

यिनै ठहरका साथ सरकारले प्रतिबन्ध लगाएपछि यो समूहले प्रतिकार गर्ने चेतावनी दिएको छ ।

प्रतिबन्ध लगाउने सरकारको निर्णयसँगै पक्ष–विपक्षमा बहस भइरहेका छन् । प्रतिबन्ध नलगाइकन गलत क्रियाकलापमा सख्त कानुनी कारबाही गर्नुपथ्र्यो भन्ने मान्यतापनि छ ।

राजनीतिक व्यवस्थाप्रति नै असन्तुष्ट यो समूहले ठाउँ–ठाउँमा ‘जनमिलिसिया’ भर्ना गर्ने तयारीसमेत सुरु गरिसकेकाले प्रतिबन्ध लगाएपछि अब मुलुक पुनः द्वन्द्वमा फस्ने आशंका जनमानसमा बढेको हो ।

अहिले हरेक चोक–चोक र सामाजिक सञ्जालमा यही विषयप्रति सबैको चासो र चिन्ता छ ।

सरकारले प्रतिबन्ध नलगाउँदा पनि खुलमखुला राज्यलाई चुनौती दिँदै विस्फोट गराउँदै आएको यो समूह अब प्रतिकारका नाममा झन् उग्र बन्ने हो कि भन्ने डर सबैमा छ ।

विप्लव समूहसँग हतियार रहेको पुष्टि प्रहरीले कपिलवस्तुमा छापा मार्दा नै भइसकेको छ ।

सरकारले अहिले ‘विप्लवसँग वार्ता गर्दिनँ’ भन्नुभन्दा वार्ताको ढोका खुला राख्दै आपराधिक क्रियाकलापमा संलग्नहरुलाई सख्त कारबाही गर्दै अघि बढ्नुपर्ने हुन्छ ।

विप्लव समूह उग्र बन्दै जाँदा सरकारले जवाफी कारबाही गर्नैपर्ने भएकाले देश पुनः युद्धतर्फ नधकेलियोस् भन्नेमा सरकार नै सचेत हुनुपर्ने देखिन्छ ।

Loading...
Aawaj Nepal

प्रतिकृया

प्रतिकृया

370X180

ताजा समाचार

धेरैपटक हेरिएको

370X180
370X180