Aawaj Nepal
Aawaj Nepal

राष्ट्रियसभा विशेष समयः सीकेसितको सम्झौता, नेकपालाई प्रतिबन्ध र प्रधानमन्त्री ‘देशभक्त’


आवाजनेपाल, २०७५ फाल्गुन २९ बुधबार


राष्ट्रियसभा विशेष समयः सीकेसितको सम्झौता, नेकपालाई प्रतिबन्ध र प्रधानमन्त्री ‘देशभक्त’

राष्ट्रियसभाको बुधबारको बैठकमा सांसद बलराम बाँस्कोटाले सरकार र ‘स्वतन्त्र मधेस गठबन्धन’बीच सम्झौता हुनु सरकारको महत्वपूर्ण कार्य भएपनि सम्झौतालगत्तै स्वतन्त्र मधेसको नारा घन्केको अवस्थालाई ध्यान दिन सरकारको ध्यानाकर्षण गराएका छन् ।

राष्ट्रियसभाको विशेष समयमा सांसद बाँस्कोटाले सम्झौतानुसार गठबन्धनका संयोजक सीके राउतले कार्यान्वयन गर्नुपर्ने नत्र सरकारले उनलाई गिरफ्तार गर्नुपर्ने सुझाव दिए ।

नेपालको संविधानले कुनैपनि दललाई प्रतिबन्ध लगाउने अधिकार नदिएको उल्लेख गरेको भन्दै सांसद बाँस्कोटाले संविधान नमान्नेलाई प्रतिबन्ध लगाउनुभन्दा पनि मूलधारमा ल्याउनुपर्नेेतर्फ सरकारको ध्यानाकर्षण गराए ।

सांसद बद्रीप्रसाद पाण्डेले सरकार र राउतबीच भएको ११ बुँदे सम्झौतामा राउत मौन देखिएको बताउँदै सम्झौताको ११ बुँदामा ‘सम्झौता आजैदेखि लागू हुने’ भनिएपनि सम्झौताकै भोलिपल्ट स्वतन्त्र मधेस लेखिएका तुल प्रदर्शन गरिएकोप्रति सरकारको ध्यानाकर्षण गराए ।

सांसद कोमल वलीले राष्ट्रको उन्नति र विकासका लागि सपना देख्ने र नाकाबन्दीका बेलामा राष्ट्रभक्तिको भावनाबाट राष्ट्रलाई जोगाउन खोज्ने प्रधानमन्त्री केपी शर्मा ओली देशभक्त भएको बताइन् ।

सांसद वृषेशचन्द्र लालले नेत्रविक्रम चन्द नेतृत्वको निर्वाचन आयोगमा दर्ता नभएको नेकपालाई प्रतिबन्ध लगाउनाले राजनीतिक स्वार्थका लागि निर्दोष मारिने र धनजनको क्षति हुने हुनाले त्यसतर्फ सरकारको ध्यान जानुपर्ने उल्लेख गरे ।

सांसद रामचन्द्र राईले वातावरण संरक्षण गर्नका लागि इलेक्ट्रोनिक मोटरसाइकल र स्कुटर दर्ता गर्ने व्यवस्था गर्ने व्यवस्था मिलाउन सरकारको ध्यानाकर्षण गराए ।

सांसद विन्दादेवी आलेले खाडी मुलुकमा लगाइएको प्रतिबन्धका कारण धेरै महिलाले यातना भोग्नुपरेको हुँदा सरकारले त्यसतर्फ ध्यान दिन आग्रह गरिन् ।

सांसद प्रमिला कुमारीले थरुहट र मधेस आन्दोलनको छानबिनका लागि सर्वोच्च अदालतका पूर्वन्यायाधीश गिरीशचन्द्र लालको संयोजकत्वका गठित आयोगको प्रतिवेदन सार्वजनिक गर्न माग गरिन् ।

सांसद कालीबहादुर मल्लले सरकारले चन्द नेतृत्वको पार्टीलाई प्रतिबन्ध लगाउन हतार गरेको उल्लेख गर्दै सो समूहलाई सरकारले वार्ता वा छलफलका लागि कतिपटक पहल गर्‍यो भन्नेबारे प्रधानमन्त्रीले नेपाली जनतालाई जानकारी दिनुपर्नेमा ध्यानाकर्षण गराए ।

राष्ट्रियसभाका अध्यक्ष गणेशप्रसाद तिमिल्सिनाले लाल आयोगको प्रतिवेदन सार्वजनिक गर्ने मागका विषयमा सरकारलाई अर्को बैठकमा जवाफ दिन निर्देशन दिए ।

पुल निर्माणलाई तीव्रता दिन माग

राष्ट्रियसभाको शून्य समयमा बोल्ने सांसदले बर्खा सुरु हुन लागेको हुनाले पुल निर्माणलाई सरकारले तीव्रता दिनुपर्नेमा जोड दिइएको छ ।

बैठकमा सांसद दुर्गाप्रसाद उपाध्यायले लुम्बिनी पर्यटकीय र धार्मिक महत्वको स्थल भएको हुनाले त्यहाँ जाने बाटामा रहेको बेथानी पुल निर्माण अझै हुन नसकेको उल्लेख गर्दै पप्पु कन्स्ट्रक्सनले काम नगरेको हुनाले ठेक्का अर्कालाई दिएर भएपनि पुल निर्माण गर्नुपर्ने सुझाव सरकारलाई दिए ।

सांसद प्रकाश पन्तले पोखरामा रहेको विजयपुर पुल निर्माण भएको ११ वर्ष नपुग्दै भत्किन लागेको हुँदा बर्खायाम नलाग्दै निर्माण गर्न माग गरे ।

सांसद नैनकला ओझाले देशमा सुकुम्बासी समस्या अझैपनि समाधान नभएको उल्लेख गर्दै कतिपय सुकुम्बासीका नाममा पुर्जासमेत नभएको भनी सरकारको ध्यानाकर्षण गराइन् ।

सांसद रमेशजंग राजमाझीले नेत्रविक्रम चन्द नेतृत्वको पार्टीलाई प्रतिबन्ध लगाउने अनि स्वतन्त्र मधेसको नारा लगाउने सीके राउतलाई मूलधारमा ल्याउने व्यवहारले कसैलाई काखा र कसैलाई पाखा भएको बताए ।

सांसद रमेशप्रसाद यादवले २०७२ सालमा थरूहट र मधेस आन्दोलनको छानबिनका लागि सर्वोच्च अदालतका पूर्वन्यायाधीश गिरीशचन्द लालको संयोजकत्वका गठित आयोगको प्रतिवेदन सार्वजनिक गर्न माग गरे ।

Loading...
Aawaj Nepal

प्रतिकृया

प्रतिकृया

370X180

धेरैपटक हेरिएको

370X180
370X180